Congress-in party President thlanna neih tur atana kaihhruaina tlangzarh

Congress party chuan October 17-a party president thlanna an neih tur atana kaihhruaina pawimawh a siamte chu nimin khan a tlangzarh.

Congress President thlanna neih turah hian party veteran Mallikarjun Kharge leh Lok Sabha MP Shashi Tharoor-te an inkhing dawn a ni.

Nimina Congress central election authority, Madhusudan Mistry hminga kaihhruaina siam an tlangzarha an tarlan ṭhenkhat chu -
1) Pradesh Returing Officer (PRO)-te chu anmahni PCC-ah ṭheuh polling officer an ni ang a, polling station enkawl kawngah mawh phurin, felfai taka inthlan buatsaih a nih theihna turin hma an la ang.
2) Congress hruaitu pahnih - Mallikarjun Kharge leh Shashi Tharoor-te chuan mahni duh thuin Congress President post hi an chuh dawn a ni. Delegate-te chu an duh zawk thlang turin zalenna a nei vek a, ballot paper hmangin an thlang ang.
3) AICC General Secretaries/ In-charges, Secretaries/ Jt Secretaries, PCC Presidents, CLP Leaders, Heads of Frontal Org. Chiefs of Depts/ Cells leh official Spokesperson zawng zawngte chuan candidate-te hi an campaign pui tur a ni lo. Candidate thlawp zawk an neih a, an campaign pui duh anih chuan an post aṭangin an bang hmasa phawt tur a ni.
4) PCC President zawng zawng chuan candidate, a tu zawk zawk pawhin an state an tlawh hunah theihtawpin an lo buaipui ve ve tur a ni.
5) PCC President-te chuan PCC Delelgate-te meeting neihpui an duh tih candidate-ten an sawi chuan, meeting hall, chair leh hmanraw dang pawh an lo buaipui vek tur a ni. Mahse PCC President-te hian anmahni thuin meeting hi an ko thei lo.
6) Inthlan hunah candidate-te hian voter-te chu motor-in an phur khawm tur a ni lo a, pamphlet leh thildangte pawh an sem tur a ni lo.