State 6-ah Assembly by-election neih hun tur puang

Election Commission of India (ECI) chuan state paruka assembly seat pasariha by-election neih hun atan November 3 a ruat a, November 6-ah result puan a ni ang.

Assembly seat pasariha by-election neihna turte hi - Bihar-ah seat hnih bakah Maharashtra, Haryana, Telangana,, Uttar Pradesh leh Odisha-ah seat khat ṭheuh a ni.

October 7-ah inthlan neih tur atana hriattirna hi tihchhuah a ni ang a, model code of conduct hman nghal a ni ang. Nomination paper hi October 14 thleng thehluh theih a ni dawn a, October 15-ah paper-te hi endikin, inhnukdawh duhte tan October 17 thleng hun hawn a ni.

ECI chuan by-election neih turah hian electronic voting machine (EVM) hman a ni dawn tih a sawi a, voter-te finfiahna atan Electoral Photo Identity Card (EPIC) emaw Voter Card hman a ni tih a sawi. Hemi rual hian official identification document dang - Aadhar Card, PAN Card leh Driving license pawh pawm a ni bawk ang.