Prince Charles-a'n India tlawh dawn

Britain ram lal fapa, Prince Charles chuan tun thla tawp lam hian southeast Asia a tlawh kual dawn a, India pawh a tlawh tel dawn.

Prince Charles leh a nupui, Camilla te zinna tur programme hi nimin khan tihchhuah a ni a, Singapore leh Malaysia an tlawh hnuah India an tlawh dawn a, Prime Minister Narendra Modi pawh an kawm nghal dawn a ni.

Britain Foreign and Commonwealth Office-a Deputy Head Philip Malone chuan Prince Charles-te nupa ram tlawh tur hi puangin, a tirah Myanmar ram chu a tlawh tur zingah sawi tel ni mah se, final programme-ah erawh telh a ni lo thung. Myanmar ramah hian security force-te beihpui thlakna avanga Rohingya Muslim-te tawrhna nasa tak a thlen mek avangin Prince Charles-a'n a tlawh hi a rem lo nia sawi a ni. Thla hmasa khan Britain chuan Myanmar-a military training programme a neih pawh a lo titawp tawh bawk a ni.