BHU hawng leh ṭan tawh

Uttar Pradesh-a Banaras Hindu University campus chhunga buaina chhuak avanga ni kaw chhung University khar a nih hnuin, Thawhlehni khan zirna chhunzawm leh a ni.

Campus chhunga zirlai hmeichhe au nawmnah leh mawi lo taka khawih tum a nih avanga zirlai lungawi loten nawrh an huaihawtnaa police-te nen nasa takin an innawr buai a, zirlai tam tak lakah FIR ziah luh a ni bawk. Campus chhunga buaina chhuak avang hian Dussehra festival puala chawlh pawh a hun hmain neih a nih phah bawk.

Thawhlehni-a university hawn ṭan leh a nih hian buaina chhuak tur venthawn thilah venhim hna thawktu tur tam tak dah an ni. Station officer Sanjeev Mishra chuan boruak tichhe zawnga chete chungah na taka action lak a nih tur thu a sawi a, zirlai naupangte chuan boruak ṭha leh muanawm tak hnuaiha an zirna an chhunzawm a duhsak thu a sawi.

BHU thuneitute chuan campus chhunga tharum thawhna thleng leh, zirlaiten police-te kut an tawrh chung­chang chhuichiang turin judicial committee a din a, committee hi Allahabad High Court judge hlui, justice VK Diskhit-a'n a ho a ni.

Campus-a buaina a chhuah hnu hian surveillance camera 30 dah a ni a, girls hostel panna hmun 15-ah halogen light dah thar a ni bawk.

September 21 zan khan hostel-a awm, zirlai hmeichhe pakhat chu hostel pana a haw laiin campus chhungah bike-a chuang mi pahnihin lo au nawmnahin, mawi lo takin an khawih niin a sawi. A chunga thil thleng hi a complaint hnuah pawh proctor chuan a ngaihsak duh lo a, Vice Chancellor pawhon hmeichhiate chu zanah hostel aṭanga chhuak lo turin a ti zui a ni. Zirlai hmeichhe harsatna tawh chungchanga university thuneitute chetdanah lungawi loin nawrh an huaihawt ta a ni.