Rahul Gandhi-a'n Amethi tlawh

Congress vice president Rahul Gandhi chuan Uttar Pradesh-a a bial, Amethi chu ni thum cham turin a tlawh.

Rahul Gandhi-a'n Amethi bial tlawh a tum chungchangah, Amethi District Magistrate Yogesh Kumar chuan a kal tum hun hi sawn hla turin a lo ngen tawh a ni. District Magistrate chuan festival a nih chhoh dawn avangin October 5 hma chuan Rahul Gandhi hi security an pe ṭha thei dawn lo niin a sawi a, hei hi Congress party chuan na takin an sawisel a ni.

Hemi hnu, Thawhṭanni khan district thuneitute chuan Gandhi hi lehkha thawn lehin, venhimna an pek theih tur thu leh, a zin tum pawh a sawnhlat a ngaih loh thu an hrilh leh a ni. BJP chuan Congress hruaitu hian a bial, Amethi hi a ngaihthahin a tlawh khat hle niin an bei fo a, August thla khan 'Rahul Gandhi awmna chin hriat loh' tih ziakin a thlalakte chu Amethi bialah thehdarh a lo ni tawh a ni. Inthlan dawnah campaign tur chauhin Amethi hi a tlawh niin an puh bawk.

Rahul Gandhi hian Amethi biala a cham chhungin loneitute hmaah thu a sawi dawn a, party worker-te a kawm bawk ang.