CBI Headquarters-ah Lalu Yadav ko

Bihar Chief Minister hlui, Rashtriya Janata Dal (RJD) hotu Lalu Prasad Yadav-a chu eiruk thubuaiah New Delhi-a Central Bureau of Investigation (CBI) headquarters-a thu zawhfiah turin nimin khan koh a ni.

Lalu Yadav hi nimin chawhma dar 11 khan CBI headquarters hi a thleng a, a fanu Misa-in a kalpui a ni. Lalu hi private firm hnena Indian Railway Catering and Tourism Corporation Ltd (IRCTC) hotel pahnih enkawlna tur contract pek chungchangah thu zawhfiah a ni.

Lalu-a fapa, Tejashwi Yadav pawh vawiin hian agency hmaah hian a inlan ve leh ang. An pafa hian eiruk thubuaiah thu zawhfiah turin CBI hian a ko a ni.

Kum 2006-a Lalu-a railway minister anih lai khan private firm, Vinay leh Vijay Kochhar-te company, Sujaa Hotel hnenah Railway hotel pahnih - BNR Ranchi leh Puri te enkawlna tur contract pek a ni a, contract an hmuh theih nan hian Patna-a company ram chu man tlawm takin Lalu-a chhungkaw company, Delight hnenah an leitir nia puh a ni. Private company hnena contract pek dan­ah Lal hian tender kalphungte a bawhchhia nia puh a ni.

Ram inleitir kaihhnawihah hian CBI chuan Lalu, a nupui Rabri leh a fapa Tejaswhi te lakah kumin July thla khan eiruk thubuai a lo ziaklut tawh a, an chhungkaw in leh hmun hrang hrang 12 chu dap a ni tawh bawk.

CBI chuan IRCTC Managing Director hlui PK Goel, Yadav-a thawhpui Prem Chand Gupta nupui leh private company director pahnihte pawh thubuai an siamsawk tawh bawk a ni.