Gujarat riot case : Zakia Jafri dilna hnawlsak
Gujarat High Court chuan kum 2002-a Gulberg Society-a intualvuakna thleng chungchanga Congress hruaitu tihhlum, Eshan Jafri-a nupui, Zakia Jafri petition thehluh chu a hnawlsak.
Kum 2002, Ferbuary 28 khan Ahmedabad-a Gulberg Society-ah intualvuakna nasa tak thlengah mi 68 an thi a, mipui thinrim kuttuara thi zingah Congress hruaitu hlui Ehsan Jafri pawh a tel a ni.
Intualvuakna thleng chungchang chu Supreme Court-in March, 2008-a a ruat Special Investigation Team (SIT) chuan a chhui a, he thil thlen laia Gujarat chief minister Narendra Modi pawh kum 2010 kha darkar kua chuang zet chu SIT hian thu an lo zawtfiah tawh a ni. SIT chuan buaina thlenga inhnamhnawihna neia puh, Modi leh midang 59-te chu an inhnamhnawih a ni tih finfiahna tur a awm lo tiin thiam a lo chantir tawh a ni.
Kum 2012, February 9 khan Jafri leh social activist Teesta Setalvad-i enkawl NGO Citizen for Justice and Peace chuan SIT-in Modi thiam a chantir chungchangah hian lower metropolitan court-ah petition an thehlut a, Modi leh midangte chu intualvuakna thlengah hian a phena inrawlha puha thubuai siamsak an phut a ni.
Mahse kum 2013 December thla khan lower court chuan SIT report hi a pawmsak a, hemi hnu hian Jafri leh NGO chuan Gujarat High Court-ah petition an thehluh ve leh nghal a, he thubuai hi a thara chhui ṭha turin an ngen bawk. Mahse SIT thutlukna ngaihtuah ṭha tur an ngenna chu High Court hian a hnawlsak ve leh ta a ni.