Samajwadi Party hotu atan Akhilesh Yadav thlan leh a ni

6th October, 2017

Uttar Pradesh chief minister hlui, Akhilesh Yadav-a chu Samajwadi Party national president atan nimin khan thlan tlin a ni.

Agra-a SP national convention neihnaah party hruaitu tur hi thlan a ni a, party president term kum thum ni ṭhin pawh kum nga-a pawtsei turin party danpui pawh an siamṭha nghal a ni.

Kum 44 mi, Akhilesh Yadav hian party president hna hi kum nga a chelh leh dawn a, kum 2019-a Lok Sabha inthlanpui leh, 2022-a state assembly inthlan neih tur pawh a kaihhruaina hnuaiah an party hian an hmachhawn ang.

SP hi chhung lamah an la buai a, national convention-ah party dintu zinga mi leh Akilesh-a pa, Mulayam Singh Yadav pawh a tello a ni. Mahse Mulayam hian conventiona-a telte chu duhsakna a hlan tih a sawi.