Delhi AAP sorkar vs Lt Governor : LT Governor-in free electricity scheme chhui turin hriattir

Delhi-a Aam Aadmi Party (AAP) sorkar leh central-a BJP kaihhruai sorkarte chu kawng hrang hrangin an la inbei chhunzawm zel. Delhi lieutenant governor VK Saxena chuan chief secretary hnenah AAP sorkarin free electricity scheme a kalpuinaah thil dik lo awmte chhui a, ni sarih hnua report thehlut turin nimin khan a hriattir.

Lt Governor hian thla thum vel kal taa khan AAP-in New Excise Policy a siamah thil fel tawk lo a awm nia sawiin, Central Bureau of Investigation (CBI) a lo chhuitir tawh bawk. 

Delhi deputy chief minister Manish Sisodia chu thil dik lo tituah puhin, a chenna in leh a bank locker thlengin a lo dap sak tawh a ni. Delhi chief minister Arvind Kejriwal chuan Lt Governor thupek tihchhuah thar chu AAP hian an huang an zauh zel avanga BJP-in hma an rawn lakna nia a ngaih thu a sawi. Assembly inthlan hmabak, Gujarat-ah AAP hian sorkar an siam chuan free electricity scheme siam an tiam a, "Gujarat chuan AAP thil tiam hi an duh a, hei vang hian BJP chuan Delhi-a free electricity scheme kalpui pawh hi titawp tir a duh a ni," a ti.

Mahse eng kawng mahin free electricity scheme an kalpui mek chu tihtawp sak an ni dawn lo a, Delhi mipuite chu an sorkar ring ngam zel turin a chah. Gujarat mipute hnenah pawh AAP an thlan tlin chuan nakkum March 1 aṭangin a thlawnin electric an hmang thei dawn tih a sawi bawk.

Prime minister Narendra Modi-a seilenna leh chief minister a lo nih tawhna, Gujarat state hian kumin kumtawp lamah assembly inthlan an nei dawn a, AAP hian ṭan an la nasa hle a, Delhi leh Punjab-a sorkarna an siam hnuah Gujarat-ah hian huang zauh ngei an tum a ni.

Delhi-ah hian domestic power consumer hi nuai 58 an awm a, an zinga nuai 47-te chuan subsidy hi an hmang thei a ni. Nuai 30 te chuan electric hi unit 200 chin a thlawnin an hmang a, nuai 15-ten 50% a tlawmin unit 400 chin an hmang thei bawk.