Amit Shah-a'n Pahari hnam tan quota siam a nih tur thu puang

Union home minister Amit Shah chu Jammu and Kashmir inthlan neih tura tana campaign-in, nimin khan Rajouri-ah Pahari hnam chu Gujjar leh Bakarwal hnamte nen, zirna in leh sorkar hnaah Scheduled Tribe (ST) anga quota an neih tur thu a puang.

Pahari hnamte hi ST status pek an nih chuan, India rama linguistic group zinga reservation siamsak hmasa ber an ni ang. Mahse hemi tihlawtling tur hian sorkar laipui chuan Parliament-ah Reservation Act a siamṭhat a ngai dawn a ni.

BJP rally-a thu a sawiah Amit Shah chuan, "Lieutenant Governor-in a din, commission chuan report thehlutin Gujjar, Bakarwal, leh Pahari hnam chu reservation siamsak an rawt a ni. Hei hi pek an ni thuai ang," a ti. J&K special status pekna, Article 370 tihtawp a nih hnuah chauh reservation hi pek theih a ni tih sawiin, "Article hi tihtawp a ni tawh avangin, minority, Dalit, tribal leh Pahari-te chuan an chanvo an nei thei tawh dawn a ni," a ti. J&K hi Muslim tamna hmun a nih avangin Hindu hi reglious minority a ni.

Amit Shah hian central-a BJP sorkarin kum 2019, August thlaa Article 370 a tihtawp hnua Jammu and Kashmir a tlawh ṭum hnihna a ni. Nimina Rajouri-a rally a neih dawn vang hian Jammu leh Rajouri district-ah mobile data service tihtawp a ni a, hei hi India dodaltuten buaina thlenna tura mobile data service an hmang tur venna atana ti an nih thu thuneitute chuan an sawi. Rally neih zawh hian Jammu-a Convention Centre-ah project hrang hranga lungphum a phum nghal bawk.