ICU-ah Mulayam Singh Yadav awm mek

Samajwadi Party (SP) hruaitu, Uttar Pradesh chief minister hlui Mulayam Singh Yadav chu Gurugram, Hayarana-a Medanta Hospital-a Intensive Care Unit (ICU)-ah awm mekin, ṭhat lam a pan thei lo nia sawi a ni.

Kum 82 mi, Mulayam Singh Yadav hi August 22 aṭang khan he damdawi-inah hian enkawl a ni tawh. Thawhṭanni khan a dinhmun ṭha lo zualin, ICU-ah dah luh a ni a, nimin lamah pawh hma a la sawn thei lo. Nimin khan a fapa, SP hotu Akhilesh Yadav pawhin a pa hi a awmpui a ni.

Political leader hrang hrangin Yadav chanchin hi ngaihtuahin, dam ṭha leh thuai turin duhsakna an hlan. Prime minister Narendra Modi pawhin Akhilesh hi biain, a pa dinhmunte a zawt a, a enkawlna kawngah a theih dan anga puih zel a inhuam thu a hrilh.