NGT-in Jantar Mantar-a nawrh huaihawt khap

National Green Tribunal (NGT) chuan Delhi sorkar, New Delhi Municipal Council (NDMC) leh Delhi Police hnenah Jantar Mantar-a nawrh huaihawt leh punkhawm, aurinna hman ṭhin chu khap a nih thu a hriattir.

NGT hian Ningani khan hriattirna hi a tichhuak a, NDMC leh Delhi Police-te chuan NGT thupek tihchhuah hi lawmawm an tih thu an sawi a, Delhi sorkar erawh chuan hemi chungchangah hian thuchhuah engmah a la siam lo.

NDMC secretary Chanchal Yadav chuan Jantar Mantar-a nawrh huaihawtten awmkhawmna hmun an siam leh loudspeaker an dahte chu an lakthlak vek tur thu a sawi.

Delhi Police thupuangtu Dependra Pathak pawhin NGT thupek chu an zirchian tur thu leh, a ṭul anga hma an lak tur thu an sawi bawk. New Delhi district deputy commissioner of police, BK Singh chuan Jantar Mantar-a nawrh huaihawtna tura phalna pek a nih tawh loh tur thu a sawi a ni. DCP chuan Jantar Mantar-a nawrh huaihawtte chu hmun dangah sawn an nih tur thu sawiin, thupek hi an zawm lo a nih chuan dan ang taka an chunga hma lak a ni dawn a ni, a ti.

Delhi Police-te chuan Jantar Mantar-ah hian chawhrualin nitin nawrh huaihawt leh punkhawm ṭum 8-10 vel awm ziah ang a nih thu an sawi.

Kumin chhungin June thla thleng khan pun-

khawm ṭum 2,283 zet huaihawt a ni tawh a, nikum chhung khan ṭum 1,921 huaihawt a ni bawk.

DCP Singh chuan Jantar Mantar-ah hian nawrh huaihawt a nih loh pawhin nitin police 100 vel chu dah reng an ni tho tih a sawi a, nawrh huaihawta pungkhawm an tam ṭum chuan paramilitary force leh district danga police-te dah belh ṭhin an nih thu a sawi bawk.