Sasikala-i a pasal damlo tlawha chhuah phalsak

Bengaluru jail-a tang mek, AIADMK hruaitu hlui VK Sasikala-i chu a pasal, Natarajan damlo tlawh turin ni nga chhung a chhuah phalsak a ni a, nimin khan jail aṭangin chhuahtir a ni.

Sasikala-i hian tunkar tir lam khan a pasal damlo tlawha chhuah hi a lo dil tawh a, mahse court-in a hnawlsak a ni. Mahse a pasal hi a dinhmun a ṭha lo hle a, a thin leh kal-te thlak a nih avang­in Ningani khan chhuah a dil nawn leh a, nimin khan phalsak a ni ta a ni.

Jail-a aṭanga ni nga chhung chhuah phalsak a nih chhung hian Sasikala-i hi politics kaihhnawih thilah a inrawlh khap a ni a, media mite a hmuh khapsak a ni bawk. Hei bakah hian a hmaa a chenna ṭhin, AIADMK hotu hlui J Jayalalithaa-i in, Chennai-a Poes Garden-ah a chen phalsak a ni lo bawk a, a chhung hnai Ilavarsi-i hnenah cheng tura tih a ni.

Sasikala-i pasal, M Natarajan hi kum 74 mi niin, thla hmasa khan damdawi-inah dahluh a ni a, Nilaini khan a thin leh kal thlaksak a ni.

Tamil Nadu-a rorellai, AIADMK hotu Jayalalithaa-i a thih hnuah a thachhang dawltu, Sasikala-i hi party hruaitu atan ruat a ni. Tamil Nadu chief minister atana lakluh tuma buatsaih a nih laiin a sum lakluh phu loa hausaa puhna thubuaiah thiam loh chantir a ni a, kumin February thla khan Bengaluru jail-ah dah luh a ni. August thla khan AIADMK hnuaia pawl hnihte chu in­chhunfinin, Sasikala-i party hruai­tu a nihna pawh an lo hlihsak tawh a ni.