Honeypreet-i'n buaina chhawk chhuak turin Rs vbch 1.25 a pe
Hindu sakhaw pawl pakhat, Dera Sacha Sauda hotu Gurmeet Ram Rahim Singh-a pawngsual thubuaia thiam loh chantir a, kum 20 tanga tura hrem a nih khan amah zuitute chu buaina chawk chhuak turin, Ram Rahim-a fa lak Honeypreet-i chuan cheng vaibelchhe 1.25 a pe nia sawi a ni.
August 25 khan Ram Rahim hi Haryana-a Panchkula court chuan thiam loh a chantir a, court thutlukna puanchhuah a nih hnu hian amah zuitute chuan tharum thawhna nasa tak chawkchhuakin, mi 40 chuangin an thih phah a ni.
Ram Rahim Singh-a'n fa atana a lak, Honeypreet-i chuan buaina chawk chhuak tur hian Dera mi leh sate chu pawisa a sem nia sawi a ni. Honeypreet-i hi Ram Rahim-a man a nih hnuah a bibo zui ve nghal a, Haryana police-te'n man tuma thla khat chuang an zawn hnuah Thawhlehni khan Punjab highway-ah an man a ni.
Police-te'n an man hnuah Honeypreet-i hi thu zawhfiah a ni. Panchkula police-te chuan Dera zuitu pakhat hnen aṭangin cheng nuai 24 an man a, heng sumte hi Honeypreet-i kaltlanga an hmuh niin, buaina chawkchhuak tura an mi leh sate hnena sem tura tih a ni. Honeypreet-i hi Dera hotu hian a ring hle a, sum enkawltu ber niin, Ram Rahim-a chhungte hnena sum pe ṭhintu pawh amah a nih thu police-te chuan an sawi.