Indian Railways-in VIP culture titawp

Indian Railways chuan office leh in lama VIP culture titawp turin hma a la mek.

Railway chuan kum 36 zet tihdan phunga alo neih tawh Railway Board chairman leh board member-ten zonal visit an neih ṭuma an thlen lai leh kalchhuah dawna general manager-te awm ngei ngei tura tih chu a titawp.

Ministry chuan September 28 khan Board chairman leh member-ten an tlawh ṭumin rel station leh airport-a inkaihhruaina dan thar hi a tichhuak a ni. Railway Board chairman Ashwani Lohani chuan official-te chu pangpar leh thilpek dang an hlan tawh tur a ni lo, a ti bawk.

Office-ah chauh VIP culture hi tihtawpa ni dawn lo a, in lamah pawh hman tel vek a ni tawh ang. Senior official-te an in lama hnathawk tura railway staff an chhawr ṭhin pawh titawp vek tura tih an ni.

Official-te chuan hnathawktu 30,000 vel chu senior official-ten in lamah an chhawr niin an sawi. Heng mite hi office lamah an hna thawk tawh tura tih an ni a, thla khat kalta chhung khan an zinga 6,000 - 7,000 vel chu office lamah an in report tawh niin ministry chuan a sawi.

Railway Ministery Piyush Goyal chuan senior official-te chu an zinnaah pawh executive class-ah kal loin, Sleeper leh AC Three-tier class ah te kal a, khualzin dangte zingah te chetla ve turin a ti a ni. Senior official zingah hian Railway Board member, railway zone genreal manager leh division 50-a divisional railway manager te an tel a ni.