Naxal helhoin naupang an hmang : UN

United Nations chuan Naxal helho chuan Chhattisgarh leh Jharkhand state-a pawi an khawihnaah naupangte an hmang ṭhin niin a sawi a, nikum chhung khan Kashmir-ah school 30 chuang hal a ni bawk tih a sawi.

Children in Armed Conflict-in annual report a tihchhuahah, UN Secretary General Antonio Guterres chuan helhote pawikhawihna thlen hian naupangte a nghawng nasa thei hle tih sawiin, a bikin Chhattisgarh, Jharkhand leh Jammu and Kashmir-ahte a nghawng na zual a ni, a ti.

UN chuan helho hian naupangte an hmang ṭhin tih report a dawn ṭhin thu sawiin, heng zingah hian Naxal helpawl pawh an tel a, Chhattisgarh leh Jharkhand-ah naupangte hi an chhawr ṭhin niin Guterres chuan a sawi.

Sorkar report-a a lan danin nikum chhung khan helhoin Jammu and Kashmir-ah school 30 chuang an hal niin a sawi bawk a, helho hian school pali chu inkulhna atan hun eng emaw chen an hmang bawk a ni, a ti.

Kum 2015-a UN report tihchhuahah khan, khatih laia UN hotu Ban Ki-moon chuan Naxal hoin state paruk - Bihar, Chhattisgarh, Jharkhand, Maharashtra, Odisha leh West Bengal-ahte naupang an chhawr ṭhin chu a lo sawi tawh bawk a ni.