Kashmir-ah plastic bullet 21,000 thawn

Central Reserve Police Force (CRPF) chuan Kashmir Valley-a nawrh huai­hawta, security force-te tawng ṭhinte beih letna turin plastic bullet 21,000 a thawn lut.

Plastic bullet hi Defence Research and Development Organisation (DRDO) duan niin, Pune-a Ordnance factory siamchhuah a ni. Heng silai mute hi AK series assault rifle-a hman theih a ni dawn a, sipaiten mu sep (pellet) an hman ṭhin thlakna atan hman a ni ang.

Jammu and Kashmir-ah hian nawrh huaihawtten security force-te beiin, lungin an tawng fo a, mipuite thunnunna atan hian security force-te chuan mu sep (pellet)an hmang ṭhin a, mahse hei hian a kah nat avangin sawisel a hlawh nasa hle. Pellet-in a fuh vang hian mi tam takin hliam tuarin, mitdel phah pawh eng emaw zat an awm tawh a ni.

CRPF director general RR Bhatnagar chuan an enchhinnaah pellet aiin plastic bullet hi a hlauhawm lohin mi a tina lo zawk tih a sawi a, mipuite thununna atana hman a ni dawn tih a sawi.