Trucker nuai 90 ten nawrh huaihawt

Sorkar laipui Goods and Services Tax policy duh lohna lantirin nimin aṭang khan ram chhunga truck khalhtu, nuai 90 te chuan ni hnih awh tur, Chakka Jam an huaihawt.

All India Motor Transport Congress (AIMTC) Additional Vice President (North) chuan sorkar nen inremna zawngin inbiakna an nei a, mahse an inrem theih loh avangin nawrh hi huaihawt a ni ta tih a sawi. Truck khalhtuten nawrh an huaihawt vang hian nitin khawsakna atana mamawh leh ei tur lamkhawmna lam thlengin a nghawng rin a ni.

Road Safety Council of the Ministry of Shipping, Road Transport and Highways member Sabharwal chuan Chakka Jam hi ni hnih hman a ni dawn tih sawiin, sorkar chuan an thil phutte chu a remtihpui thei lo niin a sawi. Nawrh huaihawt vanga trucker te sum hloh tur hi cheng vaibelchhe 2,000 zet a tling a, mahse nawrh huaihawt lo thei loin an awm niin a sawi.

Trucker-te hian GST policy chu an duh lo tih sawiin, indirect tax lakna tur zingah diesel telh an phut bawk.

AIMTC chuan GST-a transport sector bika policy hrang hrang chu hriatthiam a har thu an sawi a, a hmaa ngaihnathiam an nihna ṭhinah chuan GST vang hian registration tih luih tir an nih thu a sawi. E-Way pawh chu siamṭhat an phut bawk a ni.

Sabharwal chuan GST hman a nih hnuah pawh state tam zawkin RTO barrier chu an tihtawp loh avangin heng hmuna thamna pekna atan hian trucker te chuan sum tam tak an hloh niin a sawi. State 22 zinga pali chauhin RTO barrier tihtawp hi an remti a ni, a ti. Chhiah lak dan chungchanga sorkar ber pawh a chian loh avangin GST chu a hlawhchham ni a an ngaih thu sawiin, chhiah chi hrang pathum laksak an ni tih a sawi.