Lawng chesualah Rohingya 12 thi

Myanmar aṭanga Bangladesh-a tlanchhiat tum, Rohingya Muslim-te chuanna lawng chu Pathianni zan khan Bangladesh chhim lam, Shah Porir Dwip bulah chesualin a pil a, mi 12 an thi. Thi zinga a tam zawk hi naupang an ni.

Police-te chuan lawng chesualah hian mi eng zat nge chuang hriat a nih loh thu an sawi a, ruang 12 hmuh a nih thu sawiin an zinga 10 chu naupang niin, mipa pakhat leh hmeichhe pakhat ruang an hmu tel bawk. September 28 khan refugee 80 vel phurtu lawng a lo chesual tawh bawk a, mi 17 chauh an damchhuak a ni.

August 25-a Myanmar sipaiten Rakhine state-a Rohingya helte laka beihpui an thlak hnuah khan Rohingya 519,000 chu Bangladesh ramah an tlanchhe tawh a ni. Myanmar sipaite hi Rohingya civil mite bitum telah puh an ni a, helho laka beihpui thlak chu an ram aṭanga Rohingya te thenfaina hun remchanga hmangah puhin sawisel an tawk nasa hle. Myanmar chuan civil mite bitum tela puhna hi a pha thung.

Bangladesh-a Rohingya raltlante awmna, Cox's Bazar-ah chuan raltlan lut an pung reng a, chawhrualin nitin mi 2,000 luh belh zel ang an ni tiin UN Migration agency, International Organization of Migraton (IOM) chuan a tarlang.

Raltlante hian tuipui hlauhawm tak an paltlang hnuah kein ni eng emaw zat an kal a, Cox's Bazar hi chau leh rilṭam takin an thleng ṭhin nia sawi a ni. IOM chuan Cox's Bazar-a Rohingya te chhawmdawlna tur hian ram hrang hrang hnenah US dollar maktaduai 120 a dil a ni. Kar kalta Inrinni khan Malaysia sorkar chuan Rohingya te chhawmdawlna tur hmanrua hi metric ton 29 a thawn. UN refugee agency pawhin chhawmdawlna metric ton 500 a thawn lut tawh bawk.

Rohingya-te hi Myanmar ramah hian kum rei tak awm tawh mah se, Myanmar chuan a ram mi angin a ngai thei lo a, citizenship pawh a pe duh lo a ni.