Madras HC-in TN sorkar hnenah hriattirna pe

Madras High Court chuan AIADMK hruaitu hlui, J Jayalalithaa-i in, Chennai-a Poes Garden chu amah hriatrengna hmun atana siam tum chungchangah Tamil Nadu sorkar hnenah hriattirna a pe.

Tamil Nadu-a AIADMK sorkar chuan Poes Garden hi Jaya-i hriatrengna hmun atan siam a tum a, hemi chungchangah hian Jaya-i vahnu, J Deepa-i chuan court-ah petition a thehlut a, Jaya-i chenna siam danglam tumna chu dang turin thuneitute a ngen a ni.

J Deepa-i petition thehluh hi court chuan ngaihtuahin, Justice K Ravichandra Baabu chuan state sorkar hnenah October 23-a chhanna thehlut turin a ti. Deepa-i chuan a pi, Vedavalli khan Chennai khawpui chhungah hmun eng emaw zat a lei a, kum 1971-a a thih khan a roluah turin a fapa Jayakumar leh a fanu Jayalalithaa-i te chu a dah niin a sawi. A pi thih hnuah a pa chuan nupui neiin, a nupui leh a fate bakah a farnu (Jaya-i) te nen chuan in khatah hun rei tak an khawsa ho a ni, a ti. Mahse a hnuah an chhungkua hi tuna an chenna, T Nagar-ah an insawn a ni.

Deepa chuan nikum December-a Jaya-i a thih khan dan ang taka a roluah theitu tur chu amah leh a nuṭa chauh an nih thu a sawi a, an rochun tur zingah hian Poes Garden residence pawh hi a tel a ni, a ti. Hetih laia state sorkarin Poes Garden residence siam danglam a, Jaya-i hriatrengna hmun atana siam a tum thu thuchhuah a siam chuan a ṭhawng hle niin a sawi. He hmun hi mimal ta, dan ang taka amah leh a nuṭa ta tur a nih avangin hetiang thil hi state sorkar chuan a ti thei lo ang, a ti.