IIT Kanpur-in ragging vangin zirlai 16 hrem

Indian Institute of Technology, Kanpur (IIT-K) chuan zirlai 16 te chu zirlai luttharte an tihhrehawm, ragging an tih avangin kum thum chhung a suspend a, zirlai paruk chu kum khat atan a suspend bawk.

IIT-K-a thuneitu sang, Senate chuan third year zirlaiten an junior te thawmhnaw an hlihtir bakah, thil tih hreh­awm tak takte an tih tir chung­changa complaint a awm avangin Thawhṭanni khan meeting a nei a ni. Ragging an tih lai hi cell phone-ah lo lak a ni a, hei hi social media group-ahte thehdarh zui a ni bawk.

IIK-deputy director Dr Manindra Agarwal chuan zirlai 16-te chu kum thum chhung hrem an nih thu sawiin, an thiltih chu thil pawi lian tak a nih thu a sawi. Hrem tawk, zirlaite hian an hremna hi an appeal thei rih lo a, suspend hun chhung a zawh hnuah chauh an appeal thei dawn a, hemi hnu hian an course an zir chhunzawm leh thei dawn chauh a ni.

Zirlaite hrem an nih bakah student union president leh officer bearer dang­te pawh complaint awm chungchang an ngaihthah avangin an post aṭangin ban an ni bawk.

Junior student 30 chuan student affairs dean hnenah senior student 50 lakah complaint an thehlut a, August 20 khan senior student-te hian tinawm­nahin, thil hrehawm tak tak an tih tir niin an sawi a ni.

Zirna in hrang hrangah ragging hi khap a ni a, sorkar laipui leh Supreme Court pawh inrawlh hial mah se, zirna in eng emaw zatah chuan a la thleng fo a ni. Kum 2009 khan University Grant Commission chuan anti-ragging help­line pawh a lo siam tawh a ni.