Damchhung tang turin Tunda hrem a ni

Kum 1996-a Sonipat-a bomb tihpuah kaihhnawihah thiam loh chantir, Lashkar-e-Toiba (LeT) operative Abdul Karim Tunda chu damchhung tang tura hrem a ni.

Court of sessions judge Sushil Garg chuan nimin khan Tunda hremna tur hi a tichhuak a ni.

Tunda hi October 9 khan local court chuan Sonipat-a bomb puak thubuaiah hian thiam loh a lo chantir tawh a ni.

Kum 1996, December 28 khan Sonipat-a cinema hall-ah ṭum eng emaw zat bomb a puak a, mi tam takin hliam an tuar a ni. He pawikhawihna thlengah hian LeT bomb-expert, Tunda hi mawhphurtu bera puh a ni.

Kum 75 mi, Tunda hi India-in 26/11-a Mumbai khawpui beihnaa inhnamhnawiha puh, firfiak 20 te hlan tura Pakistan sorkar hnena a ngen zingah a tel bawk. Kum 2013, August 16 khan Delhi Police-te chuan India-Nepal border bul, Banbasa-ah an man a, ramchhunga bomb tihpuahna hrang hrang 40-ah inhnamhnawiha puh a ni bawk a ni.