J&K CM hlui Mufti-i'n house arrest niin a insawi ; Twitter-ah J&K police-ten an chhang let

Jammu and Kashmir chief minister hlui, Mehbooba Mufti-i chuan nimin khan north Kashmir lam tlawh a tum chu remti loin, police-ten pawn chhuak thei loin a inah an hreng niin a sawi.

J&K police-te chuan twitter-ah chhang let ve nghalin, People's Democratic Party (PDP) hruaitu hi hren a ni lo a, a duhna hmuna kal turin a zalen tih an sawi ve thung.

Mufti chuan Srinagar aṭanga km 54 vela hla, Baramulla-ah union home minister Amit Shah-a'n public rally a neih avangin, Srinagar aṭanga km 25 vel, Pattan-ah an party worker-te inneihna a kal tur chu dan a ni tih a sawi. Hemi hnu hian a chenna inah, pawn chhuak thei loh hren a ni zui tih sawiin, a gate an kalhsak thlalak pawh a twitter-ah a dah lang a ni.

"Home Minister chu Kashmir-ah a duh dan anga a kalvel theih laiin, Pattan-a party worker inneihnaa ka kal tum vang ngawtin house arrest-ah dah ka ni. Chief Minister hlui dikna chanvo pawh awlsam taka an hreksak theih chuan, mi nawlpuite harsatna tawn tur chu ngaihtuah ngam pawh a ni lo," tiin a sawi.

Mufti-i'n a twitter-a a post aṭanga minute 40 vel hnuah Srinagar Police-te chuan CM hlui hi Pattan a kalna turah khuahkhirhna engmah siam a ni lo tih sawiin, a gate thlalak a dah pawh amahin a chhung lam aṭanga a kalh niin an sawi sak bawk. Pawn lam aṭanga a gate hi kalh a ni lo tih sawiin, thlalak an dah ve leh bawk a ni.