PM-in AIIMS Bilaspur a hawng

Prime minister Narendra Modi chuan nimin khan Himachal Pradesh-a cheng vaibelchhe 1,470 senga sak, All India Institute of Medical Sciences (AIIMS) Bilaspur a hawng.

AIIMS Bilaspur sakna tur lungphum hi PM chuan kum 2017 khan a lo phum tawh a ni. He hospital-ah hian specialty 18 leh super specialty department 17 a awm a, modular operation theatre 18 a awm bawk.

Hospital hi Pradhan Mantri Swasthya Suraksha Yojana (PMSSY) hnuaiah siam niin, khum 750 a awm a, heng zingah hian ICU khum 64 a awm bawk a ni. Khum 30 awmna, AYUSH block khum 30 awmna pawh a awm bawk. Hei bakah hian tribal area-a chengte tan awlsam zawka an dawr theihna turin hospital hian Centre for Digital Health an din bawk a ni.

AIIMS Bilaspur -ah hian kumtin MBBS course zirlai 100 bakah nursing course zirlai 60 lak an ni ṭhin dawn tih sorkar thuchhuah chuan a tarlang.