Gambia-a naupang 66-te thihna thleng chungchangah India rama siam khuh damdawi 4 zir chiang dawn
World Health Organisation (WHO) in Gambia rama naupang 66-te thihna thleng chu India rama siam khuh damdawi pali-te vang a ni thei nia a sawi hnuah, sorkar laipui chuan Haryana-based pharmaceutical firm siam khuh damdawite hi a zirchiang dawn.
Ministry of health and family welfare chuan WHO hian September 29 khan Drugs Controller General of India (DCGI) hnenah khuh damdawi chungchang hi a lo thlen tawh tih a sawi. Central Drugs Standard Control Organisation chuan Haryana regulatory authority pawh sawipui nghalin, uluk zawka zirchian a ni dawn tih a sawi a ni.
Heng khuh damdawite hi Haryana-a Sonepat-a M/s Maiden Pharmaceutical Limited siam a ni a, Gambia ramah chauh an la thawnchhuak niin an tarlang. An puhna chungchangah hian company lam hian engmah an la sawi lo a, Delhi-a an administrative office chu an khar tawh thung.
Hetih lai hian WHO chuan khuh damdawite hi Gambia ram chauh ni lo, ram dangah pawh thawnchhuah a nih mai theih thu a sawi. WHO hotu Tedros Adhanom Ghebreyesus chuan chanchinthar lakhawmtute hnenah, heng khuh damdawi palite hian naupang 66-te thihna, an kal (kidney) chhiatna nen inzawmna a nei nia a lan thu a sawi. WHO chuan naupangte thih hun erawh a sawilang lo.
Health Ministry chuan khuh damdawi palite sample hi la vekin, central leh regional laboratory hrang hrangah endik a ni dawn a, a result pawh hriat theih thuai a ni dawn tih a sawi. India ram aṭanga damdawi thawnchhuahte hi a lo dawngtu ramten an lo test ve leh ziah ṭhin a, Gambia rama test a nih laia a ṭhat lohna hmuh a ni lo tih chungchang pawh zawtin, Gambia ram hian test loin a lo hmang em ni tih erawh WHO lam hi hriattir a ni lo tih an sawi.
WHO-in khuh damdawi pali hming a tarlante chu Promethazine Oral Solution, Kofexmalin Baby Cough Syrup, Makoff Baby Cough Syrup leh Magrip N Cold Syrup-te an ni. Heng damdawi siamtu company hian WHO hnenah an damdawi himna leh quality chungchang hi engmah an la hriattir lo tih an sawi bawk. Sample an enchhinnaah heng khuh damdawiah hian pawm theih chin aia tam diethylene glycol leh ethylene glycol-te an awm a ni, a ti. Heng substance hi mihring tan a hlauhawm a, thihna hial a thlen thei a ni, a ti bawk.