Sonia Gandhi'n Bharat Jodo Yatra a zawm

Congress party-in Bharat Jodo Yatra an neih meka chu nimin khan party president Sonia Gandhi chuan Karnataka-a Mandhya district-ah a zawm ve.

Rahul Gandhi hoa Bharat Jodo Yatra an neih hi Karnataka state chhungah an kal mek. September 8 khan Kanyakumari, Tamil Nadu aṭanga kal ṭanin, September 30 khan Karnataka state hi an lut. Nimin kha ni 29 an kalna a ni a, Karnataka state-ah hian ni 21 hun an hmang dawn a ni.

Sonia Gandhi hi a hriselna lam ṭhat tawk loh vangin hun eng emaw chen thiltihkhawmnaah pawh a inlan mumal tawh lo a, kumin kumtir lama Covid-19 hri a kai enkawl dam a nih hnua vantlang thiltihnaa a inlanna hmasa ber a ni. Sonia Gandhi hian ṭum hnih Covid-19 hri hi a kai a, a natna dang vang pawhin damdawi-in lamahte enkawl a lo ni tawh bawk.

Congress president hian yatra hi zawmin a fapa, Rahul Gandhi kiangah a kal a, party worker-ten an lo lawm hle. Thui vak lo a kal hnuah car-in phurh a ni leh phawt a, a hnuah kawngzawhte hi ke in a zawm ve leh a ni.