Attari border-ah Pakistan flag aia sangah India flag zar tum

National Highway Authority of India (NHAI) chuan Attari border-ah India national flag sang ber tur, feet 418-a sanga zar a tum.

Sorkar laipui leh state sorkar aṭangtein remtihpuina an hmuh tawh thu sawiin, NHAI official chuan he project thawk tur hian contractor pawh a ruat tawh a ni, a ti.

Attari border-ah hian kum 2017, March thla khan Rs vbc 3.5 sengin feet 360-a sangah India flag hi zar a ni tawh a, mahse hemi kum August thla khan Pakistan chuan an ram chinah, Wagah check post bulah feet 400-a sangin an ram flag an zar zui ve nghal a ni. Hei vang hian Pakistan flag aia sanga zar turin hma lak thar a ni leh ta a ni.

NHAI official chuan, ni 15-20 hnuah flag zarna tur siam hna hi thawh ṭan a ni tawh dawn tih sawiin, an zarna tur hmun tak hi thlan fel a la ni lo a, mahse joint check post (JCP)-a spectator gallery bul hnaia siam rawt a ni, a ti. Tuna India flag inzar mek chu Beating Retreat ceremony en tura kalten gallery building vangin an hmu ṭha thei ṭhin lo niin a sawi bawk. Tuna flag zar mek chu lakthlak a ni rih dawn lo a, flag thar zar hunah lakthlak a nih tur leh tur loh chu ngaihtuah a la ni chauh ang.