Union Law Minister-in a thlaktu tur rawt turin CJI UU Lalit hrilh

Union law minister Kiren Rijiju chuan nimin khan chief justice of India UU Lalit hnenah, amah thlaktu hming rawt turin a hrilh.

"Chief Justice of India leh Supreme Court judge-te ruat dan tur chungchanga Memorandum of Procedure (MoP) in tarlan angin, Minister of Law and Justice chuan Chief Justice of India hnenah hian amah thlaktu atan ruat tura a rawt hming thawn turin ngenna lehkha a pe a ni," tih Union Ministry of Law& Justice chuan a tarlang.

Justice Lalit hi kumin August 27 khan CJI 49-na atan lakluh a ni a, mahse he post hi ni 74 chauh a chelh thei dawn a, November 8-ah a chawl ang.

Tihdan phungah chuan CJI ṭanglai hian amah thlaktu atan judge senior ber an rawt ṭhin. Kum 2016-a Supreme Court judge atana ruat, justice DY Chandrachud chu judge zinga senior ber a ni. Justice Chandrachuh-a pa, justice YV Chandrachud hi Chief Justice of India 16-na leh, he post chelh rei ber a ni. Chandrachud hi CJI thar atana ruat a nih chuan kum hnih dawn he dinhmun hi a chelh thei dawn a ni.