Gambia-a khuh damdawi thawn 4-te India ramah hralh an ni ve lo

Union health ministry chuan Gambia rama naupang 66 thihna thleng nena inzawmna neia puh, India rama siam khuh damdawi palite chu India ram chhunga hralhchhuah an ni ve lo tih a sawi.

Maiden Pharmaceutical Limited siam, khuh damdawi pali - Promethazine Oral Solution BP, Kofexnalin Baby Cough Syrup, MaKoff Baby Cough Syrup leh MaGrip n Cold Syrup-te hi zirchian mek a ni. Health Ministry chuan zirchianna an neih chinah, company hnenah hian an khuh damdawi siamte hi ram pawna thawnchhuah phalna chauh pek niin, hei pawh hi Gambia ramah chauh thawnchhuah phalsak an ni, a ti.

Gambia sorkar chuan khuh damdawi a semchhuah tawhte hi a lakir leh mek. Gambia Red Cross Society nena thawkdunin, ministry of health chuan ṭhalai mi za tel chhawrin, in tinah kalin heng khuh damdawite hi an lakir leh mek a ni.