Rajesh Talwar-te nupa thiam chantir

Allahabad High Court chuan an fanu thatua puh, Dr Rajesh Talwar leh a nupui Nupur Talwar-te chu kum li tantir an nih hnuah thiam a chantir.

High Court chuan lower court-in Talwar-ten nupa thiam loh a lo chantir tawhna chu a hnawlsak a, tualthatua puh an nih chungchangah pawh Talwar-te nupa thiam loh chantirna tur khawp hmuh a ni lo, a ti.

Kum 2008 khan Dr Talwar-te fanu, kum 14 mi Aaruhsi leh a an awmpui, Hemraj-a te ruang chu Noida-a Talwar chhung­kaw chenna inah hian hmuh a ni. Ruang hmuh a ni hnuah Rajesh Talwar-te nupa hi tualthattua puhin man an ni a, kum 2013 khan special CBI court chuan damchhung tang turin a hrem a ni.

He tualthah thubuai chhuitu CBI chuan Rajest Talwar hi tualthattu ni ngeia a rin thu a sawi a, mahse hemi finfiahna tur erawh a nei ṭha tawk lo a ni. Hei vang hian he thubuai hi chinfel theih loh, unsolved mystery tia khar mai a duh thu pawh a lo sawi tawh a ni.

Talwar-te nupa hian an puhna hi thu dik lo a nih thu sawiin, thiam loh chantir an nih chung­chang hi Allahabad High Court-ah hian an khing let a ni. High Court-in thiam a chantir tak avang­in Talwar-te nupa hi vawiin hian jail aṭangin chhuahtir an ni dawn niin an ukil chuan a sawi.