Nov 9-ah Himachal Pradesh assembly inthlang dawn

Himachal Pradesh assembly inthlan chu November 9-ah neih a ni dawn.

Election Commission of India chuan Ningani tlai khan Himachal Pradesh inthlan neih hun tur hi a puang a, hetihlai hian nakum January 22-a assembly term tawp tur, Gujarat Assembly inthlan neih hun tur erawh a puang tel lo.

Chief Electon Commisioner AK Joti chuan Himachal Pradesh inthlan result hi December 18-ah puan a ni dawn tih a sawi a, Gujarat inthlan neih hun tur pawh tihfel la ni lo mah se December 18 hmaa neih a nih tur thu a sawi bawk. Himachal Pradesh assembly term hi nakkum January 7-ah a tawp dawn a ni.

Himachal Pradesh-ah chuan inthlan hun puan a nih avangin model code of conduct hman nghal a ni. Joti chuan Himachal-ah hian a ṭum khatna atan hmeichhia chauhin an enkawl polling station 136 siam a ni dawn a, constituency tinah pahnih ṭheuh siam a ni dawn tih a sawi. Assemby seat 68-a inthlanna neih turah hian vote thlakna tur, polling station hi 7,521 a awm dawn a, hengah hian EVM leh VVPAT te thlunzawm vek a ni ang. Voting compartment pawh inches 24 aṭangin inches 30-ah tilen a ni dawn bawk. Inthlana chuh tumte tan October 23 thleng nomination a thehluh theih dawn a ni.

Election Commission-in Gujarat assembly inthlan neih hun tur a puang tel lo chu eptuten an sawisel a, central-a rorellai BJP sorkar chuan inthlanni puan hun tikhawtlai turin EC hi a nawr niin an puh.

Prime Minister Narendra Modi chuan kar leh hian Gujarat tlawhin, state khawpui Gandhinagar-a mega rally a neihnaah state tana hmalakna tur hrang hrangte puan a tum niin eptute chuan an sawi. EC-in inthlan neih ni tur a puan chuan model code of conduct hman nghal a ni dawn a, hei vang hian PM hian sorkar laipuiin Gujarat tana a thiltih tumte a puan theih dawn loh avangin EC chuan inthlan ni tur puang rih lo turin a ti a ni, tiin Congress chuan a sawi.