Congress hruaitu sawm vangin College principal suspend

Madhya Pradesh-a BJP sorkar chuan sorkar college principal, BL Ahirwar chuan an college inkhawm buatsaihah special guest atana Congress MP, Jyotiraditya Scindia a sawm avangin a suspend.

Principal BL Ahirwar thawhna college hi Ashoknagar district-a Mungaoli biala awm a ni a, hrem a nihna chhan hi thil dang vang ni loin Congress hruaitu a sawm vang chauh nia sawi a ni.

Ahirwar chuan, " Scindia hian college zirlaite kawm a duh a ni. Kan bial MP a nih avangin dan ang pawhin sawm theih a ni a, hei vang hian kan sawm a ni. Mahse function neih tukah suspend-na order hi ka hmu ta nghal a ni", a ti.

Principal hi Dalit hnam a ni a, suspend-na order tihchhuahah hian Scindia hi a hming hi ziahlan ni lo mah se, college function neihnaah Congress hruaitute sawm an nih chungchang erawh ziahlan an ni.

Ahirwar chuan, "Congress hruaitu ṭhenkhatten Scindia an rawn ṭawiawm avangin hian mawhphurtu ka ni lo. Function neihna hmunah hian party banner emaw, poster emaw pawh engmah tar a ni lo. Political party inbeihna karah ka tlazep a ni", a ti.

Scindia pawhin college principal suspend a ni chu a sawisel a, engmah hriattir lawk leh sawfiahna pawh awm loa institution hotu ber chunga action lak a ni chu ṭha lo a tih thu sawiin, hei hi BJP kaihhruai sorkar nihna dik tak lanna a ni, tiin a sawi. College principal in an function neihna tura an bial MP a sawm tel chu suspend a tawh phahna tur khawp pawikhawihna a ni lo tiin a sawi.