Pakistan-in LoC-ah silai hmetpuak leh

Pakistan sipaite chuan nimin zing khan Jammu and Kashmir-a Poonch district-a Krishna Ghati sector-ah Indian post an kap leh. Hei hi darkar 24 chhunga Line of Control (LoC) a inkahhai puan palzuta silai an hmehpuah ṭum thumna a ni.

Defence thupuangtu chuan Pakistan sipaiten LoC-ah silai an hmehpuah leh thu hi sawiin, zing dar 7.45 vel khan silai leh laipui hmanga Indian post te an beih thu a sawi a, hei hi India sipaiten an chhang let nghal niin a sawi.

Ningani khan Pakistan sipaite hian Poonch-a LG sector-ah inkahhai thuthlung hi an lo palzut tawh bawk a, an silai hmehpuahah hian mi parukin hliam an tuar a ni.

October 6 khan Pakistan sipaite hian Rajouri district-a Baba Khori leh hmun dangah Indian post te an lo kap tawh bawk a, October 4 khan Poonch sector an kah avangin Indian army jawan pathumin hliam an tuar.