Visakhapatnam-ah Gas pût vangin 11 thi
Andhra Pradesh-a industrial center tia sawi, Visakhapatnam daifem, RR Venkatapuram-a LG Polymers chemical plant-ah nimin zing khan gas a pût a, mi 11-in an thih phah. Thi zingah hian naupang pahnih an tel.
Gas pût vang hian mi 1,000 chuangin harsatna an tawh phah a, an zinga mi 25-te chu an dinhmun a ṭha lo hle.
LG Polymers plant hi hri leng vanga ram puma lockdown kalpui a nih avangin khar a ni a, ni 40 chuang zet khar a nih hnuah nimin zing dar 2:30 vel khan plant hawng turin hnathawkte an kal a ni. Khua a var hnuah plant bul hnaia awm mi ṭhenkhat chu nikhaw hre loa an awm hmuh an ni ta a ni.
Gas a pût chhuah dan tak hi hriatchian a la ni lo a, mahse police officer Swaroop Rani chuan lockdown vanga hun rei tak enkawl mumal loha awm, ton 5,000-a rit tank pahnih
aṭangin gas hi a pût niin a sawi.
Gas put vanga harsatna tawk, thawk lama harsatna nei leh nikhaw hre loa awmte hi King George Hospital (KGH)-ah dah luh nghal an ni. Visakhapatnam police commissioner Rajiv Kumar Meena chuan gas pût vanga thawk lama harsatna neih avangin mi pali an thih thu a sawi a, anni bakah hian he hmun tlanchhiatsan tum mi pahnihte chuan accident an tawh thu a sawi bawk.
National disaster response force hotu, SN Pradhan chuan LG Polymers plant awmna aṭanga km thum biala awmte chu gas pût hian a nghawng tih a sawi. Heng biala cheng mi tam tak chuan an taksa a thak bakah, an mit pawh a nat thu an sawi.
Nimin zinga gas pûtna, LG Polymers plant hi polystyrene siamna hmun a ni. Kum 1961 khan Hindustan Polymers tia din a ni a, mahse kum 1997 khan South Korea company, LG Chem in lachhawngin, a hming pawh LG Polymers India tia thlak a ni.
Andhra Pradesh chief minister YS Jagan Mohan Reddy chuan gas pût vanga thi chhungte hnenah zángnadawmna, Rs vaibelchhe khat ṭheuh pek a ni dawn tih a sawi. Harsatna tawk damdawi-ina ni 2-3 chhung enkawl ngaite hnenah hian Rs nuai 1 ṭheuh leh, ventilator hmanga ekawl ngaite hnenah Rs nuai 10 ṭheuh a pe dawn bawk. Heng bakah hian AP sorkar chuan gas pût tuartute zawng zawng hnenah Rs 25,000 a pe dawn bawk.
Prime minister Narendra Modi chuan nimin khan union home ministry leh National Disaster Management Authority (NDMA) hnenah Vizag-a thil thleng hi ngaihven zui turin a hriattir nghal a ni.
Nimina thil thleng hi mi tam takin kum 1984-a Bhopal gas pût nen an tehkhin zui. Kum 1984-a Bhopal-a chhiatna thleng hi industry lama chhiatna thleng rapthlak ber zinga chhiar tel a ni a, mi 3,500 velin an thih phah a, mi nuai khat chuangin an hriselna kawngah harsatna an tawh zui phah a ni.