Maha leh Gujarat-te hri dona kawngah ṭan la turin ti Ram pumah Covid-19 kai 52,000 chuang awm tawh
Sorkar laipui chuan Maharashtra leh Gujarat sorkarte chu nasa zawka Covid-19 hri dona kawnga thawk turin a hriattir.
Maharashtra leh Gujarat-a district ṭhenkhatah Covid-19 vanga thi hi an pun belh a, hei vang hian sorkar laipui chuan he hri dona kawngah hian ṭan la zual turin state sorkar pahnihte hi a hriattir zui ta a ni.
Nilaini khan Maharashtra health minister leh Gujarat deputy chief minister-te chu union health minisiter Dr. Harsh Vardhan hoa video conference buatsaihah an tel ve a, he hunah hian Vardhan chuan state pahnihte hnenah hian hri kai pun tamna hmunah te chuan nasa zawka ṭan la thar turin a fuih.
Vardhan chuan ramchhung hmun ṭhenkhatah hri kaite thinhrikna a awm avangin damlohna nei pawhin midang an hrilh hreh phah tih a sawi a, heng dam lote hian hri an kai nge kai lo tih finfiah turin damdawi-in an pan hreh phah a ni, a ti. Hetianga inthinhrik leh inenhranna awm ṭhin tihbo a nih theihan turin sorkar chuan mipuiteah zirtirnate pe tam se a duh thu a sawi bawk.
Ministry of health and family welfare-in a tarlan danin, nimin thleng khan ram pumah Covid-19 kai hi mi 52,952 an awm tawh. He hri vanga thi hi mi 1,783 awmin, hri kai zinga 15,266 chu enkawl dam an ni tawh thung.