Rajasthan-ah ni hnih chhungin Zu Rs vbc 196 man hralh

Rajsathan-ah chuan ni hnih leh chanve chhungin zu cheng vaibelchhe 196 man an hralh hman a, hetihlai hian eptu lam chuan chief minister Ashok Gehlot chu online-a zu zuar tur leh home delivery ti turin an phut thu an sawi ve bawk.

Rajsathan-ah hian zu lei tur hian thui tak tak an intlar a, social distancing dan bawhchhiatna a nasa hle, excise department leh police-te chuan zu lei tur hi vengin midang hlata awm turin an fuih reng chungin an thunun hlei thei lo. Zu hralh chhuah zinga 85% dawn hi Indian-made foreign liquor (IMFL) a ni.

Ashok Gehlot kaihhruai sorkar hian inkharkhip vangin chhiah aṭanga an sum hmuh tur Rs vbc 10,000 vel zet an hloh tawh avangin zu dawr hi an hawng a, zu aṭang hian thla khatah chhiah Rs vbc 1200 vel an hmuh theih an beisei.

Hetih mek lai hian opposition leader Gulab Chand Kataria chuan Chief Minister hnenah hian zu zawrh chungchangah hian online booking tih theihna tur buatsaih tur leh home delivery ti turin a ngen a, hei hi Covid-19 darh zel tur venna atana a tih a ni.

Online sale leh home delivery hi ti turin mipui lam aṭang pawhin ngenna a nasa hle a, Rajasthan High Court hnenah pawh PIL-te pawh thehluh a ni hial tawh.