Taj Mahal hi ram phatsantute sak a ni : BJP MLA

Uttar Pradesh BJP MLA Sangeet Som chuan Taj Mahal chuan Indian history-ah hmun a chang tur a ni lo tiin, he hmun hi ram phatsantute sak a ni a, Indian culture tihmelhemtu a ni, a ti.

Pathianni-a Meerut dis­trict-a Sisoli khuaa function neihaah MLA Som hian UP Tourism booklet-a Taj Mahal telh a nih loh vanga mi tam tak lungawi loh chungchang a sawinaah hei hi a sawichhuak a ni. Som chuan Mahal satu Shahjahan chu ama pa ngei tan tirtu a ni a, Hindu nuaibo a duh a ni, a ti. Hetiang mite hi Indian history-a telh an nih chuan India tan thil

ṭha lo tak a ni a, an khing let hial dawn niin a sawi. Hei bakah hian Mohammad Ali Jauhar University pawh firfiakte awmkhawmna hmun niin a sawi bawk.

BJP hruaitu hian a hma pawhin inhnialna chawk thei thu a lo sawi fo tawh a, Muz­zaffarnagar tualchhung buaina thleng chungchangah pawh inhuatna chawk tho thei zawnga thu a sawi avangin thubuai siamsak a ni a, mahse a hnuah a thubuai hi tihtawp sak a ni.

BJP chuan MLA thusawi chungchang hi an pawmpui lo tih sawiin, a mimal ngaihdan a nih thu an sawi. UP sorkar pawhin MLA thusawi hi chhang letin, Taj Mahal chu India-in a rohlu pakhat a nih thu a sawi a, CM Yogi Adityanath pawhin cultural heritage-ah a ngai a, khualzinte hmuh duh ber pakhat pawh a ni, a ti. Agra leh Taj Mahal chawikan zel chu UP sorkar chuan a ṭum a, Taj Mahal chu an chhuang hle tih sorkar thupuangtu, Reeta Bahuguna Joshi chuan a sawi.

Eptute chuan BJP MLA thusawi hi an sawisel nghal a, BJP chu inhuatna thu thehdarhah puhin, history chu thlak danglam theih a ni lo, an ti. Samajwadi Party thupuangtu, CP Rai chuan history aṭang chuan thil ṭha leh ṭha lo te zir tur a awm a, BJP MLA thu sawi dan chu a rilru zim thlak hle a ni, a ti.

AIMIM hotu Asadudin Owaisi chuan Sangeet Som leh BJP chu sawiselin, "Red Fort pawh ram phatsantu a tihten an sak tho a ni. PM Narendra Modi chuan Red Fort-a hnam puanzar a pawhpharh ṭhin chu a titawp tawh dawn em ni? Modi leh Yogi-te chuan ramchhung leh rampawn aṭanga khualzin kalte chu Taj tlawh tawh lo turin an ti dawn em ni?" tiin a zawt let.

Uttar Pradesh-a BJP sor­kar hian tourism booklet a tichhuak thar a, hetah hian UP-a khualzinte tana tlawh chakawm tur hmun hrang hrangte an tarlang a, mahse Taj Mahal hi telh a ni ve lo. Hetih lai hian CM Yogi-an puithiam hna a lo thawh tawhna, Gorkakhpur temple chu tourist destination ah hian telh a ni thung.

CM Yogi chuan an state-a sorkar hmasa, SP sorkarin ramdang palai khualzinte hnena thilpek atana Taj Mahal lem siam a lo pe ṭhin chu a sawisel tawh a, Taj Mahal chu India culture nena inzawmna nei lo a ni tiin a sawi tawh a ni.