Congress-in Nov 8-ah black day hmang dawn

Congress party chuan sorkar laipuiin pawisa note lian pahnih a ti thih champha vawi khatna, November 8 hian ram pumah black day a hmang dawn.

Eptu party lian ber chuan BJP kaihhruai sorkar laipuiin pawisa note lian pahnih a tih thih hian mipuite tan harsatna nasa tak a thlen bakah, ram economy thlengin a nghawng niin a sawi. Sorkar laipuiin pawisa note a tih thih chhuanlama a hman, black money tihbona tur nia a sawi chu a hlawhtling lo a ni tia sawiin, sorkar thil tum a hlawhchham zia lantir turin black day hi an hmang dawn tih an sawi.

Congress hruaitu leh party thupuangtute chu ram chhungah kalkualin, pawisa note tihthihin ram sum leh pai dinhmun lamah nghawng ṭha la a neih dante mipui hrilh hriat an tum a ni. Party research cell chuan sorkar laipuiin pawisa note tih thih chungchanga a thil tum a hlawhtlinpui lohzia kimchang taka tarlanna turin data pawh an siam dawn a ni.

Congress vice president Rahul Gandhi chuan pawisa note tih thih hi pawisawi lo nunna latu leh ram economy chhiatna thlentu a ni tiin a lo sawi tawh a, Prime Minister hlui leh economist, Manmohan Singh pawhin a lo sawisel tawh bawk.

Youth Congress thupuangtu, Amrish Ranjan Pandey chuan PM hian pawisa tih thih a nih hian ni 50 chhungin engkim a fel leh tur thu a tiam a, mahse ni 365 hun pek a nih pawhin engmah awmzia a la awm lo niin a sawi. Thutiam rin tlak lo leh auhla tih vel bak engmah ala awm lo a ni, a ti.