Shiv Sena party-a pawl pahnihte hming leh symbol tur thlang turin ti

Shiv Sena party-a Uddhav Thackeray lamṭang leh Eknath Shinde lamṭangten party hming leh symbol neitu zawk nihna an inchuhna kal zelah, Election Commission of India (ECI) chuan thupek tichhuakin, pawl pahnihte hi an party hming leh symbol thlang turin a hriattir.

ECI chuan Mumbai-a Adheri East bye-election neihna turah pawl pahnihte Shiv Sena party leh symbol hman a phalsak lo a, hei vang hian an party hming atana an hman tur leh, symbol tur hi thlang turin a ti a; party hming atan hian thlan tur hming pathum thehlut ve ve turin a ti a ni.

Eknath Shinde kaihhruaiin Shiv Sena MLA zinga a tam zawk chu Uddhav Thackeray kaihhruai ṭangrual sorkar lakah an hel a, ṭangrual sorkar an thlawpna hnukdawkin chief minister aṭangin Thackeray chu a ban phah a ni. Hemi hnu hian Shinde leh a lamṭangte hian BJP an thawhpui a, sorkar thar an siam zui nghal a ni. Shinde lamṭangte hian MLA an ngah zawk avangin anmahni chu a ziding zawk niin an inchhal a, Thackeray lamṭangte nen hian party hming leh symbol chhawmtu nih an inchuh zui a, hun eng emaw chen an buai tawh a ni.

ECI-in hriattirna a pek hnuah, by-election neih tura hming leh symbol hman tur ngaihtuahin nimin khan Thackeray leh Shinde pawlte hian meeting an nei zui nghal ve ve a ni.