DMK hotu atan chuhtu awm loin MK Stalin tling

Tamil Nadu chief minister MK Stalin chu nimin khan rorellai, Dravida Munnetra Kazhagam (DMK) party president atan chuhtu awm loin a tling.

Nimina Chennai-a DMK general council meeting-ah Stalin hi party president term hnihna chelh tura thlan a nih thu an puang a ni.

An term hnihna turin Duraimurugan leh T R Baalu-te pawh an post ngai, general secretary leh treasurer-ah thlan tlin an ni ve bawk.

Kum 69 mi, Stalin hi party hruaitu hlun, M Karunanidhi fapa naupang zawk niin, a hmain an party-a post pawimawh hrang hrang a lo chelh tawh a ni. Kum 2018-a Karunanidhi a thih hnuah party president atan lungrual taka thlan a ni a, DMK president ni thei pahnihna a ni.

DMK hi kum 1949-a din a ni a, party dintu CN Annadurai chu kum 1969 thleng khan general secretary niin, president an nei ngai lo. Annadurai thih hnuah, kum 1969 khan party president post hi siamin, Karunanidhi chu party president hmasa ber atan lakluh a ni a, a thih hma zawng he dinhmun hi a chelh zui a ni.