Kum 2019 inthlanpuia BJP chak lohna LS bial 40-ah PM Modi-a'n rally nei dawn

Bharatiya Janata Party (BJP) chuan kum 2024 Lok Sabha inthlanpui neih tur atana campaign-na kal zelah, prime minister Narendra Modi chuan kum 2019 inthlanpui neih ṭuma BJP chak lohna bial hrang hrangah rally a nei dawn tih an sawi.

BJP lamin an sawi danin, Lok Sabha seat-ah an chak lohna, seat 144 zinga seat 40 bialah PM Modi hian rally pui tham tak a nei dawn a, a bak seat 104-ah hian BJP president JP Nadda, union home minister Amit Shah leh union cabinet minister-te zin kualin, public meeting an nei dawn bawk a ni.

Minister-te hian a kalna bialah ṭheuh tualchhunga sakhaw hrang hrang hotute, khawtlang hruaitute chu hmuin, an inah ngei tlawh an tum dawn a, hei bakah tualchhung festival-ahte an telpui bawk ang. Union minister 40-te hi an bial tlawh turah hian tih tur point 5 ṭheuh pek an ni.

Lok Sabha inthlanpui neih tur atan hian kum hnih zet hun la awm mah se, BJP hian a term thumna atana central-a sorkarna siam leh ngei tumin hma an la a, Mission 2024 blueprint an buatsaih mek a ni. An chak lohna bial, nasa zawka beihpui thlak an tumna zingah hian Congress president Sonia Gandhi bial Rae Bareli, Samajwadi Party hruaitu Mulayam Singh Yadav bial Mainpuri te, Supriya Sule bial Baramati leh Nakul Nath bial Chhindwarap-te pawh an tel.