PM Modi-an AIIA a hawng

Prime Minister Narendra Modi chuan National Ayurveda Day denchhenin, nimin khan ramchhunga a hmasa ber tur, All India Institute of Ayurveda (AIIA) chu New Delhi-ah a hawng.

PM chuan khum 200 awmna tur ayurveda hospital chu All India Institute of Medical Sciences (AIIMS) zulzuia kalpui tur a nih thu sawiin, he hospital hi techonology thar ber hmanga thuam a ni, a ti. Sorkar laipui chuan hetiang hospital hi ram chhung district tina siam a tum dawn tih a sawi bawk.

AIIA hi ministry of Ayurveda, Yoga and Naturopathy, Unani, Siddha and Homoeopathy (AYUSH) hnuaiah a awm dawn a, damlote enkawlna ṭha pek tum anih bakah, ayurvedic products ṭhat leh rintlak dan chungchang zirchianna hmun atan hman a ni bawk ang.

Modi chuan ramin a tihdan phung lo neihte zahpui chuan hma a sawn theih loh tih a sawi a, hun rei tak chhung he kalphung hi ngaihthah leh theihnghilh lo ni tawh mah se, tunah chuan ngaihhlut a hlawh chho leh ṭan a ni, a ti.

PM chuan ayurveda ṭhatna chu tam tak a awm thu sawiin, mite pawhin traditional medicine lam hi an ngaihven thar hle niin a sawi. He sector-ah hian investment tam zawk tih pawh a ngaih thu a sawi, private company-te chu yoga leh ayurveda chawikanna tura tha thawh turin a ngen.

AIIA outpatient department (OPD) hi kalpui a ni tawh a, he hmunah hian ruh lam natna te, diabetes leh metabolic disorder, allergic disorder, yoga, panchakarma, kriyakalpa, diabetic retinopathy leh infertility lamte enkawl a ni.

Hospital sak hna thawh khatna hi cheng vaibelchhe 157 senga thawh a ni. Hospital-ah hian panchakarma therapy clinic a awm a, he hmunah hian laboratory leh diagnostic lab te a awm tel a, athology, biochemistry, microbiology tests leh radiology scans te an ti thei a ni.