Rashtrapati Bhavan pawh hi tihchhiat ni rawh se : Azam Khan

Uttar Pradesh BJP MLA Sangeet Som-an Taj Mahal chu ram phatsantu, mahni pa ngei pawh tantir duhtu sak a ni a, hei vang hian Indian history-a hmun a chang tur a ni lo a, India culture tihmelhemtu ani tiin a sawi a, hei hian sawizui a hlawh hle.

Som hian Mughal lal Shah Jahan chu Hindu-te nuaibo tumtu a ni a, India rohlu anga ngaih a nih chuan India history chuan siam danglam a ngai a ni, tiin a sawi. Eptu pawl hruaitu hrang hrangte chuan BJP MLA thusawi dan hi sawiselin an chhang let a ni.

UP-a eptu pawl lian ber, Samajwadi Party MP Azam Khan chuan BJP MLA ngaihdan hi pawm a nih dawn chuan, India mite sala chhawr a, ro lo rel tawhte hriat­rengna awm theite chu tihchhiat vek tur a ni, a ti. Parliament, Qutab Minar, Rashtrapati Bhavan, Red Fort, Taj Mahal-te chu tihchhiat a ni vek mai tur a ni, a ti.

SP thupuangtu Juhi Singh pawhin Taj Mahal chungchang chu inhnialbuaina atana hman tur a ni lo tih sawiin, UP sorkar tan sum tam tak a lalut a ni, a ti.

Jammu and Kashmir eptu pawl hruaitu, Omar Abdullah pawhin Independence Day-ah Prime Minister Modi chuan Red Fort-ah ni loin, Nehru Stadium aṭangin thu a sawi tawh dawn em tih an hre chak tawh hle tih a sawi bawk.