Najeeb Ahmed-a nu leh midang 30 hreng

Jawaharlal Nehru University (JNU) zirlai, chin hriat loha hun rei tak awm tawh, Najeeb Ahmed-a nu leh zirlai dang 30-te chu Delhi High Court kawta nawrh an huaihawt vangin Thawhṭanni khan Delhi Police-ten an man.

Police-te chuan Najeed-a nu, Fatima Nafees leh JNU zirlaite hi court compound-ah luh an tum niin an sawi a, an mi mante hi Barakhamba Road Police Station-ah an hruai a ni.

Kum 27 mi, Najeeb hi JNU-a M.Sc Biotechnology zirlai a ni a, nikum October 14 zan khan university campus chhungah RSS zirlai pawl, Akhil Bharatiya Vidyarthi Parishad (ABVP) member-te nen inhnialbuaiin, a tuk October 15 khan a awmna hostel, Mahi-Mandvi hostel aṭangin chin hriat lohin a bo zui nghal a ni.

Najeeb-a bo chungchang hi Delhi Police-ten an chhui a, kumin May 16 khan a chhui hna hi CBI kutah hlan a ni. Mahse CBI hian a thil chhui chungchanga report thar a thehluh theih loh avangin August thla khan High Court pawhin a lo sawisel tawh a ni. September 6 khan court chuan Najeeb-a zawn hna hi chak zawka kalpui turin CBI hi a hriattir tawh bawk.

Nafees hian CBI in Najeeb chungchang a chhuinaaah report mumal tak a thehluh loh chuan nawrh huaihawt a tum thu a lo sawi tawh a ni.