AIADMK symbol hman theih loha dah duh

Tamil Nadu-a rorellai, AIADMK hnuaia pawl pahnihten an party symbol, hnam pahnih lem an inchuh mek chungchang chu nimin khan ngaihtuah a ni a, chinfel a la ni lo.

TTV Dhinakaran-a kaihhruai pawlte chuan AIADMK hnuaia pawl dang pakhat chu a lem nia sawiin, party symbol chu tu pawl zawk mah­in an hman theih loh tura dah turin Election Commission hnenah a ngen. October 23-ah hemi chungchang hi ngaihtuah chhunzawm leh a ni ang.

Dhinakaran leh Sasikala-i lamṭang aiawha ding, law minister hlui Ashwimi Kumar chuan party symbol an inchuh chungchanga a lehlam pawl, EPS-OPS council-in affidavit an thehlut tam tak chu a lem, an siamchawp niin a sawi. Hei vang hian EC chu uluk taka affidavit-te enfiah tura an ngen thu a sawi bawk.

Mahse EC chuan affidavit zawng zawng ennawn leh vek tura ngenna chu a hnawl a, EC hnena ziaka thlen chauh loh chu an pawm loh tur thu a sawi.

OPS-a lamṭang aiawhtu, advocate Vaidyanathan chuan a lehlam pawlin an puhna hi hnialin, Dhinakaran-a lamte chu thil dik lo an hmu a nih chuan FIR thehlut mai turin a cho let thung. Dhinakaran-a pawl lam chuan hun tikhawtlai an tum mai mai niin a sawi a, MP leh MLA pawh an nei tlem zawk a ni, a ti. Hei vang hian party symbol hmang thei tu zawk inchuhnaah hnehna an chang ngei dawn niin a sawi.

Madras High Court chuan party symbol inchuh chungchang hi November 10 hmaa chingfel turin Election Commission hi hun a pe a ni.