UP CM hlui, SP hotu Mulayam Singh Yadav a thi

Uttar Pradesh chief minister ṭum thum lo ni tawh, Samajwadi Party (SP) dintu ni bawk, Mulayam Singh Yadav chu damdawi-in lama hun eng emaw chen enkawl a nih hnuah nimin zing khan kum 82 mi niin Gurgaon-a Medanta Hospital-ah a thi.

Singh hi August thla aṭang khan damdawi-inah hian enkawl a ni a, tlakhniam lam a pan zel avangin kar hmasa khan ICU-ah dah a ni.

Mulayam Singh hi MLA-ah ṭum 10 leh Lok Sabha MP-ah ṭum sarih thlan tlin a ni tawh a, Prime Minister candidate-ah pawh sawirik a lo ni tawh ṭhin. Kum 1996-98 chhung khan union defence minister a ni bawk. A fapa, Akhilesh Yadav chu kum 2012-2017 khan Uttar Pradesh chief minister a lo ni ve tawh bawk a ni.

Singh hi wrestler hlui niin, politician fing leh remhria nia sawi a ni ṭhin. Uttar Pradesh-a SP-in sorkarna a siam theihna atan Bahujan Samaj Party, BJP leh Congress pawh a lo thawhpui tawh a ni.

Ram hruaitu leh political leader hrang hrangte Mulayam Singh Yadav an ui thu hi an sawi. Prime minister Narendra Modi chuan Yadav chu mi ṭha tak, a inngaihtlawmna avanga miten an ngaihhlut, mipuite harsatna hriatthiampuitu a ni tiin, a ui thu a sawi. Emergency hun laia democracy tana beitu pawimawh niin Defence Minister anih lai pawhin India ram chak zawk siam tumin theihtawp a chhuah a ni, a ti. President Droupadi Murmu pawhin Mulayam Singh Yadav thihna chu ram tana channa nasa tak a nih thu a sawi.

Uttar Pradesh chief minister Yogi Adityanath chuan Mulayam Singh Yadav chu a ui thu sawiin, chief minister hlui hi state pumah ni thum chhung sun a ni dawn tih a puang a, sorkar chawimawina nen vui a nih tur thu a sawi bawk.

Samajwadi Party president Akhilesh Yadav chuan a pa chu a seilenna, Saifai khuaah vui a ni dawn tih a sawi.