Union minister 70-ten J&K an tlawh dawn

Central-a BJP sorkarin 'Public Outreach Programme' a siam chu nimin khan thawh thumna kalpui ṭan a ni a, hemi pual hian union minister 70 chuan Jammu and Kashmir an tlawh dawn.

Union home minister Amit Shah chuan J&K hi tlawhin, Rajouri leh Baramulla-ah road show a lo nei tawh a ni.

Nimin aṭang khan union minister-te hian J&K hi an tlawh ṭan a, district 20 pawh an tlawh kual vek dawn a, union territory-a dah an nih hnuah hnathawh hrang hrangte an endik ang. Hei hi kum thum liam taa sorkar laipuiin J&K special status pekna, Article 370 titawp a, J&K state ṭhiat a, union territory pahnih - J&K leh Ladakh-a a ṭhen hnua union minister-ten public outreach programme an neih ṭum thumna a ni ang.

Outreach Programme thawh thumna hi union minister of state for food processing, consumer affairs and public distribution and rural development department-in bul a ṭan dawn a, October 10-12 chhungin Kashmir hmarlama Baramulla district a tlawh ang. Union minister of state for finance Pankaj Choudhary chuan October 12-15 hian Shopian district a tlawh bawk ang.

Union MoS for Tribal Affairs Renuka Singh chuan October 19-20 hian border district, Rajouri a tlawh dawn a, October 10-12 hian Union MoS for Minority Affairs John Barla chuan Ramban district tlawhin, Union MoS for Animal Husbandry, Dairying and fisheries Sanjeev Kumar Balian chuan October 11-12 ah Shopian district a tlawh dawn bawk a ni.

Union minister hrang hrangte hi an inkalchhawk dawn a, Rajnath Singh Nirmala Sitharaman leh Nitin Gadkari-te pawhin J&K hi an tlawh dawn a ni.