Team Thackeray leh Team Shinde-te party hming tur thlan sak

Election Commission of India chuan Maharashtra by-election neih tura Shiv Sena party chhunga pawl pahnih, Uddhav Thackeray lamṭang leh Eknath Shinde lamṭangte'n party hming tur a thlansak ta.

Thackeray pawl leh Shinde pawlte hian Shiv Sena party ziding zawk nia inchuhin, party hming leh symbol chhawmtu nih an inchuh mek a ni. Mahse ECI chuan by-election lo awm turah heng pawl hnihte hi Shiv Sena party hming leh symbol hman a khapsak a, an party hming leh symbol thar siam tura tiin, hming leh symbol pathum ve ve thehlut turin a ti a ni. An thehluh hnuah an party hming hman tur hi a lo thlansak ta a ni.

Uddhav Thackeray lamṭangte chu Shiv Sena Uddhav Balasaheb Thackeray tih an ni dawn a, an symbol atan mashaal (flaming torch) pawmsak a ni. Eknath Shinde pawl lam chu Balasahebanchi Shiv Sena tih an ni thung ang. Shinde pawlte hian Shiv Sena election symbol 'bow and arrow' chu hman an tum a, mahse Election Commission hian phalsak loin a dang thlang turin a ti leh.

Kumin June thla khan Maharashtra-a Uddhav Thackeray kaihhruai ṭangrual sorkar lakah Shinde leh a lamṭang Shiv Sena MLA 48 te hi helin, BJP puiahnain CM Thackeray leh a kaihhruai sorkar hi an paihthla a ni. Hemi hnu hian Shinde lamṭangte hian BJP nen ṭangrual sorkar din zuiin, Shinde hi chief minister-ah dah a ni a, BJP hruaitu Devendra Fadnavis chu deputy chief minister-ah dah a ni.