ED-in TMC MLA Manik Bhattacharya man West Bengal CID-in BJP MLA thu zawtfiah

Enforcement Directorate (ED) chuan West Bengal-a rorellai, Trinamool Congress (TMC) MLA Manik Bhattacharya chu nimin zing khan primary zirtirtu lak danah thil fel tawk lo a awm nia a sawi chungchangah an man.

Bhattacharya hi West Bengal Board of Primary Education chairman hlui a ni a, ED lam chuan an thil chhuinaah a thawhpui ṭhat duh loh avangin man a ni tih an sawi.

ED officer chuan, "Thawhṭanni tlai khan Bhattacharya hi zirtirtu lak dana thil fel tawk lo awm chungchangah thu zawhfiah a ni. Mahse investigator-te chu a thawhpui ṭha lo a, thu dik tawk lo hrilh a tum a ni," tiin thu an zawh hnuah man a ni tih a sawi a ni.

Primary school zirtirtu laknaah hian inthamna nasa tak thlengin, exam-naa tichhe tak tak pawh thuneitute thamna pein an tling nia sawi a ni. July thla khan ED hian West Bengal education minister hlui Partha Chatterjee chu an lo man tawh bawk.

BJP MLA thu zawtfiah
Nimin vek khan West Bengal CID chuan BJP MLA Niladri Sekhar Dana chu AIIM-Kalyani-a thawktu laknaa thil dik tawk lo awm chungchangah thu an zawtfiah ve bawk.

CID hian a hmain BJP hruaitu fanu, AIIMS-Kalyani-a thawk tura lak, Maitri Dana chu thu an lo zawt tawh bawk a ni.

BJP MLA hian thawktu laknaah hian thuneihna dik lo taka hmangin, Nadia district-a hospital-a thawk turin a fanu hi a laktir nia puh a ni. Hemi chungchang hi hna diltu dangten complaint an thehluh hnuah, CID hian a chhui zui a ni.

Police-a complaint thehluhah hian thil dik tawk lo tihnaah hian Dana bakah, union minister of state for education Subhas Sarkar, BJP MP Jagannath Sarkar, BJP MLA Bankim Chandra Ghosh leh midang pali pawh inhnamhnawiha an hming tarlan tel an ni bawk.