Kashmiri separatist Altaf Shah a thi

India ram aṭanga inlakhran duh, Kashmiri separatist Altaf Shah chu nimin khan Delhi-a All India Institute of Medical Sciences-ah a thi.

Alfat Ahmas Shah hi firfiakte sum hmanga pui ṭhina puh chungchangah man niin, kum nga chhung Delhi-a Tihar Jail-ah a tang tawh a ni. Kum 66 mi, Altaf Shah hi Kashmir-a separatist hotu lar zinga mi, nikum September 1-a thi Syed Ali Shah Geelani-a makpa a ni.

Shah chhungte chuan renal cancer neiin hun eng emaw chen aṭang khan a hriselna dinhmun pawh a ṭha lo a, mahse jail-ah hian damdawi lam enkawlna a dawng ṭha lo niin an sawi. RML Hospital-ah enkawl hmasak a ni a, a chhungten Delhi High Court-ah an thlen hnuin AIIMS-ah hian dah luh a ni. A fanu, Ruwa Shah chuan twitter lamah a pa dinhmun ṭhat loh thu hi ṭum eng emaw zat tarlangin, prime minister Narendra Modi leh union home minister Amit Shah-te hnenah pawh, a hriselna ṭha loh avangin a pa chu chhuah zalen a, zalen ni chunga thih tir turin a lo ngen fo tawh a ni.